GOTT BLAÐ, BETRA BLAÐ.

Ég beið spenntur í dag eftir að sjá eintak af Morgunblaðinu eftir ritstjóraskiptin.Sagt frá að breytingar yrðu strax frá og með blaðinu í dag. Það er augljós breyting á útliti,efnisvali og röðun á efni í blaðinu. Allt finnst mér þetta vera jákvætt og þetta eintak lofar góðu að verið sé að gera gott blað enn betra.

Morgunblaðið hefur lengst af haft yfirburðastöðu á markaði dagblaðanna. Reyndar hefur á síðustu árum verið hart sótt að blaðinu af fríblöðunum svokölluðu. Satt best að segja finnst mér alveg með ólíkindum hversu vel Morgunblaðinu hefur tekist að halda í áskriftarfjöldann miðað við þróunina. Landsmenn fá nú flestir fríblöðin til sín eða geta sótt þau á auðveldan hátt. Fólk getur lesið fréttir og annað á netinu. Það  hefur því verið mikið afrek hjá Styrmi ritstjóra og hans fólki að geta gefið út dag hvern jafnmikinn eintakafjölda og raun ber vitni af vönduðu dagblaði.

Áður fyrr var Morgunblaðið og Sjálfstæðisflokkurinn eitt og það sama. Það hlýtur að hafa verið erfið og óvinsæl ákvörðun að slíta blaðið frá flokknum.Ég man þá tíð í pólitíkinni í Eyjum að það kom oft til tals á fulltrúaráðsfundum Sjálfstæðisflokksins,hvað væri eiginlega að gerast með Morgunblaðið. Á þeim bænum voru nú oft höfð stór orð um þá sem ekki voru alveg á sömu línu og það virðuleg rá flkksins. Raddir heyrðust um að Morgunblaðið væri orðið málgagn vinstri manna eða jafnvel kommúnista. Mörgum Sjálfstæðismanninum fannst það undarlegt að sjá viðtöl og greinar forustumanna vinstri flokkanna í Morgunblaðinu.

Auðvitað hefur þetta verið framsýni hjá Morgunblaðinu að hætta að vera pólitískt málgagn Sjálfstæðisflokksins. Pólityísku blöðin hættu að koma út eitt af öðru en Morgunblaðið lifði.
Það verður eftirsjá af Styrmi ritstjóra. leiðarar hans,Reykjavíkurbréf og maður tali nú ekki um staksteina hafa verið meistaralega skrifaðir pistlar og oft á tíðum ansi harðar ádeilur.

Fyrsta eintakið hjá nýjum ritsjóra var frísklegt og vonandi tekst honum að efla enn frekar Morgunblaðið, gera gott blað enn betra.