OF MIKIÐ HEIMANÁM?

Nú er skólaárinu að ljúka hjá grunnskólunum og nemendur væntanlega fegnir að komast út í sumarið.Á síðustu árum hefur skólastarfið verið að breytast á margan hátt. Skólinn er nú einsetinn og jafnt og þétt hefur kennslustundum fjölgað og veran í skólanum lengst bæði hvað varðar byrjun og enda skólaárs.

Þrátt fyrir allar þessar breytingar hef ég velt því fyrir mér hvort margir skólar halda enn í þann gamla sið að senda nemendur með svo og svo mikið heimanám.Ég held að það sé staðreynd að enn hafa margir skólar það vinnulag. Er rétt að senda unga krakka með verkefni sem þau eiga að leysa heima?Á það ekki að vera hlutverk skólans að sjá um kennsluna og að aðstoða við lausn verkefnanna.

Skólinn verður að gera ráð fyrir því að nemendur geti átt  stundir til að sinna sínum áhugamálum.

Aðstæður heimafyrir eru misjafnar og margir foreldrar stunda þannig vinnu að þau hafa lítinn tíma til að aðstoða börn sín við heimanám. Ekki má heldur gleyma því að námsefnið núna er allt öðruvísi heldur en það sem var þegar foreldrarnir voru í grunnskóla.

Foreldrar sem hafa unnið langan vinnudag eru kannski ekki vel upp lögð við að aðstoða börnin við mikið heimanám. Skólinn verður einnig að gera ráð fyrir því að foreldrarnir geti átt sinn frítíma.Auðvitað er það svo spurning hvað vinnst með því að senda nemendur heim með verkefni,sem verða til þess að skapa togstreitu og leiðindi á heimilinu.Heimanám er einn af þeim þáttum sem skólasamfélagið þyrfti að taka til alvarlegrar umræðu. Mér finnst að foreldrar geti gert þá kröfu að nemendur geti lokið sínum vinnudegi í skólanum.

Meginmarkmið skóla er að skapa þannig andrúmsloft að nemendum og starfsfólki líði vel. Jákvætt andrúmsloft hvetur nemendur til dáða og auðvitað fellst menntun í meiru heldur en bara bóklegu námi. Með því að leggja heimanám að mestu niður myndi það leysa margan vanda á heimilum og gera nemendur ánægðari í skólanum. Nái skólinn að kveikja áhuga nemenda munu þeir að sjálfsögðu afla sér þekkingar fyrir utan skólann t.d. með því að leita á netinu að fróðleik. Það hlýtur að vera mun ákjósanlegra heldur en það skylduheimanám sem alltof lengi hefur verið.

Gleymum því ekki að skólinn er eins og hver annar vinnustaður og yfirleitt er ekki gert ráð fyrir því á vinnustöðum að fólk taki vinnuna með sér heim.