DÚETT ÖGMUNDAR OG DAVÍÐS. "VIÐ BORGUM EKKI".

Stundum verður maður hissa á hvernig umræðan þróast.Ég get ekki séð annað en Ögmundur sé í raun að segja alveg nákvæmlega það sama og Davíð Oddsson sagði í frægum Kastljósþætti.

Ögmundur telur ríkisstjórnina ekki hafa heimild til að skuldbinda komandi kynslóðir um mörg hundruð milljarða. Það gerist varla öðruvísi en við sleppum því að taka ábyrgð á skuldum bankanna erlendis. Er það ekki nákvæmlega sama og Davíð sagði.

Ögmundur vill láta kanna lagalegan rétt okkar hvort eða hvað mikið við þurfum að greiða. Samkvæmt áliti sumra lögmanna telja menn það ekki skyldu okkar eða að við berum lagalega skyldu til að ábyrgjast greiðslur á erlendum innlánsreikningum. Er Ögmundur hér með sömu hugmyndafræðina og Davíð?

Hitt er svo annað mál hvort það væri nokkuð gott fyrir komandi kynslóðir ef við reyndum ekki að ná samkomulagi við erlendar þjóðir um að ábyrjast greiðslur.

Varla verður það nú gott til afspurnar ef orð formanns stærstu launþegahreyfingarinnar á Íslandi verða túlkuð á sama hátt og orð Davíðs.

Skoðun Ögmundar finnst mér athyglisverð með tilliti til þess að formaður Vinstri grænna hrópaði á hjálp til Norðmanna. Varla hefur hann nú verið að tala um annað en lántöku. Einhverjir þyrftu nú að borga það lán.

Merkilegast af öllu finnst mér þó að Ögmundur og Davíð skulu nú hafa myndað dúett um að borga ekki.

Ekki hefði maður nú búist við að þessir tveir mynduðu dúett.

Rangt að skuldbinda ófædd börn

Athugasemdir

[Jón Steinar Ragnarsson, 20.10.2008 kl. 21:32]

Auðvitað borgum við ekki brúsann. Ástæðan: Við getum það ekki og við þurfum þess ekki. Þegar gengið verður í þessa lagalegu hlið þá munu allir skilja það og sjá. Þér er máske meira annt um að það verði talað vel um Íslendinga næstu ár, en að þeir sem erfa landið geti lifað sómasamlegu lífi. Þá get ég sagt þér það að mannorðið er þegar niður í svaðið troðið og þessi ákvörðun mun engu breyta um það. Þetta snýst ekki um persónurnar Davíð og Ögmund. Ef þú hefur nálgast þín sveitarstjórnarmál með slíku viðhorfi þá er mér til efs uum að það hafi veriðð farsælt. Mikið er ég feginn að þú hefur ekki atkvæðisrétt í þessum málum. Fáa hér á blogginu hef ég séð meira út á túni en þig. Með fullri virðingu annars.

[Lára (IP-tala skráð) 20.10.2008 kl. 21:38]

Já þeir eru að segja það sama báðir tveir.  Þeir vilja gera það sama og flestir aðrir gera í þessari stöðu og það er að borga það sem okkur ber að borga samkvæmt lögum.  Ef við samþykkjum að borga allar skuldir bankanna sem voru einkarekin fyrirtæki, þá erum við að sökkva þjóð okkar.  Þetta eru svo gífurlegar upphæðir.  Jú við getum tekið þetta á okkur en eiga komandi kynslóðir þá ekki bara eftir að fara.  Af hverju ættu þær svo sem að sitja í skuldasúpu sem þær bera enga ábyrgð á?  Ríkið á að borga aðeins það sem ríkið hafði lofað fyrirfram að taka ábyrgð á.  Við eigum ekki að þurfa að borga skuldir óreiðumanna  sem ráku einkarekin fyrirtæki og sukkuðu í útlöndum.  Í því hefur Davíð rétt fyrir sér. 

[Sigurður Þórðarson, 20.10.2008 kl. 22:44]

Er ekki bara málið að ríkisstjórnin og stjórn Seðlabankans séu ábyrg in solidum fyrir hirðuleysi í starfi?

[Sigurður Jónsson, 20.10.2008 kl. 23:27]

Ég var að vekja athygli á því að Ögmundur er raunverulega að taka undir með Davíð að ekki sé hægt að setja þungar byrðar á þjóðina til margra ára vegna glæfralegra fjárfestinga 30 einstaklinga. Það hefur verið haldið uppi látlausri gagnrýni á Davíð,en ætli það séu nú ekki margir ansi sammála honum þegar upp er staðið.