Námskeið fyrir þingmenn í mannasiðum.

Þingmenn segjast hafa miklar áhyggjur af því að almenningur beri ekki lengur neina virðingu fyrir Alþingi og því starfi sem þar fer fram. Nokkrir þingmenn geta kennt sér um hvernig komið er að maður tali nú ekki um forystumenn núverandi ríkisstjórnar sem sýna þingmönnum hroka og yfirgang.

Það er vissulega hægt að taka undir með Styrmi Gunnarssyni að nauðsynlegt er að hafa námskeið fyrir þingmenn í mannasiðum. Það er fáránlegt að það eina sem virðist kennt er að segja háttvirtur og hæstvirtur. Þessi orð nota þingmenn óspart í ræðum sínum en láta svo fylgja með alls konar niðrandi ummæli um andstæðing sinn og oft á tíðum slíkt orðbragð sem ekki væri liðið að nemendur viðhefðu í grunnskóla. Nærtakast er að taka dæmi um Björn Val þingmann VG.

Hvernig getur almenningur borið virðingu fyrir Alþingi eftir að hafa horft á útsendingu frá vinnustaðnum. Þegar sýnd er yfirliotsmynd blasa við auðir stólar og aftur auðir stólar. Einn þingmaður í ræðustól,sem talar um eitthvert mál sem hann segir að sé stórmál og snerti hagsmuni allra Íslendinga. Í mesta 3-4 þingmenn sitja í salnum og enginn ráðherra í sínum stól.

Svo koma þingmenn og spyrja einn af þessum þremur í salnum út í ræðuna og hann kemur og veitir andsvar og þingmaðurinn svarar andsvari og aftur kemur þingmaður og veitir andsvar við andsvari og þannig koll af kolli. Þessi leikur á þingi stóð til klukkan fjögur síðustu nótt.

Já, það þarf vissulega að halda námskeið í mannasiðum fyrir þingmenn og ráðherra.

Þingmenn fari á námskeið í mannasiðum