HVERNIG YRÐI ÞJÓÐFÉLAGIÐ ?

Enn halda þessi samtök áfram sínum fáránlegu mótmælum og virðast hafa það helst að markmiði að brjóta íslensk lög.

Hvernig væri að velta fyrir sér hvernig ástandið yrði í okkar landi ef allir sem væru óhressir með eitthvað beittu slíkum vinnubrögðum. Við bifreiðaeigendur erum bál reiðir vegna eldsneytisverðsins. Eigum við að hlekkja okkur við bensíndælurnar til að vekja athygli á því ? Ef við erum óhress með verð í einhverri búð,eigum við að loka henni með valdi þangað til hún lækkar verðið?

Hvernig þjóðfélag yrði til ef allir höguðu sér eins og Saving Iceland? Ég held að engin vilji svona vinnubrögð, það hlýtur að enda með ósköpum.

Það verður að komna í veg fyrir ofbeldisaðgerðir Saving Iceland með öllu tiltækum ráðum.

 

Engar umferðartafir við Straumsvík

Athugasemdir

[Guðmundur (IP-tala skráð) 1.8.2008 kl. 16:42]

Ja, Sigurður, finnst þér virkilega svona voðalegt að hugsa til þess að lýðræðið væri virkara í íslensku þjóðfélag og að fólk væri ekki eins sinnulaust og léti sig varða þjóðfélagsmál meir en það gerir!?

 Á hvaða málefnalega grunni sitja þínar pólitísku skoðanir eiginlega?

"Það verður að komna í veg fyrir..." segir þú "....Saving Iceland með öllum tiltækum ráðum."

í ofanverðri setningu er líklega svarið við spurningu minni falið. Sigurður, þú berð hreinlega enga virðingu fyrir lýðræðislegum rétti til mótmæla. Þú villt kveða þetta fólk niður með "öllu tiltækum ráðum."

Hvaða tiltæk ráð þóknast þér, Sigurður?

Fangelsanir, hleranir og aðrar persónunjósnir, ófrægingarherferðir í fjölmiðlum... hvar á að setja strikið, Sigurður?

Ég spyr því það sem ég hef þegar talið upp hefur verið og er enn notað gegn umhverfisverndarsinnum hér á landi, hvort sem þó þeir hafi tekið þátt í starfi SI eður ei.

Og heyrðu Sigurður, hvernig getur maður eins og þú látið það út úr sér að kalla þetta "ofbeldisaðgerðir", vitandi vel að SI eru stökustu friðarsinnar og hafa aldrei skert hár á höfði nokkurs manns í sínum aðgerðum??!!

[Óskar Helgi Helgason (IP-tala skráð) 1.8.2008 kl. 17:14]

Góðan dag; Sigurður !

Guðmundur ! Tek undir; með þér. Sigurði, sem öðrum lítilþægum fylgjurum Sjálfstæðisflokksins væri nær, að ígrunda; og það alvarlega, hversu flokkur hans, er búinn að stórskaða eðlilegt mannlíf, á landi hér, og hygla sér og sínum, ótæpilega.

Björgun Íslands (Saving Iceland), er ekki það hættulegasta, við að etja, hér á Fróni, miklu fremur óþverraháttur Haarde liðsins, hvert upp gengur í niðurdrepandi hugmyndafræði illmennanna Davíðs Oddssonar og Halldórs Ásgrímssonar, sem eiga eftir, að verða okkur dýrir, áður en yfir líkur.

Það skyldi þó ekki verða; að styttra myndi í, áhrínsorð Krukks gamla, en margur hyggur, vera munu ?

Um leið; er rétt að taka það fram, að þú færð hvarvetna góðan vitnisburð, hjá þeim fyrrum sveitungum þínum; Sigurður, sem ég hitti, á ferðum mínum, suður í Garði, og sakna margir veru þinnar þar. Þykist vita, að þeir Gnúpverjar, sem og Skeiðamenn, megi vel við una, þína hætti, sem þeir syðra, fyrrum.

Ætíð rétt; að taka fram, það sem vel er um menn, sem sýna þá, að engum er alls varnað, þótt glámskyggni byrgi sýn viðkomandi, á þessi hrottamenni, hver Sjálfstæðisflokki frjálshyggju og græðgi stýra, nú um stundir. 

Með kveðjum, samt, úr Efra- Ölvesi /

Óskar Helgi Helgason, frá Gamla Hrauni og Hvítárvöllum 

[Axel (IP-tala skráð) 1.8.2008 kl. 17:22]

Ég er hjartanlega sammála þér Sigurður.

Og Guðmundur.  Saving Iceland, og skríllinn sem (skemmdaverka)félagið var stofnaðí kring um hafa margoft brotið lög, allaveganna er það mín persónulega skoðun.  Undanfarnar vikur hafa þau t.d. framið brot sem hafa í för með sér almannahættu s.br. lög nr19, gr.168, með því að trufla umferð, fyrst við Grundartanga og núna við Straumsvík.

Einnig vill ég halda því fram að þær aðgerðir sem þetta félag hefur stundað vegi all hressilega að atvinnufrelsi þeirra sem búa og vinna á Íslandi, atvinnufrelsi sem á að vera tryggt samkvæmt stjórnarskrá.

En minnisstæðast er mér þó þegar mótmælendur voru sakaðir um ólögmæta frelsissviftingu í ágúst 2005.  Þegar 8 erlendir mótmælendur lokuðu sjálfa sig og 7 starfsmenn hönnunar á Egilsstöðum inni í um 20 mínútur.  Ég ætla ekki að fullyrða það að einhverjir eða allir þessir 8 mótmælendur séu í dag í Saving Iceland, en það kæmi mér hreinlega ekki á óvart.

[Óskar Helgi Helgason (IP-tala skráð) 1.8.2008 kl. 17:31]

Góðan dag; Axel !

Hygg; að þeim Sigurði, sem Guðmundi og öðrum skrifurum þætti ei lakar, gerðir þú nokkur skil á, hver þú ert, og fyrir hvaða hatt þú standir, að nokkru.

Munt þú vera fylgjari þess rummunga stjórnarfars, við hvert Íslendingar búa, nú um stundir ?

Með kveðjum; enn /

Óskar Helgi Helgason  

[Eva Hauksdóttir (IP-tala skráð) 1.8.2008 kl. 17:32]

Hvernig yrði þjóðfélagið ef fólk hætti að sætta sig við óréttlæti og valdníðslu?

Svar: réttlátara og betra.

Ef bifreiðaeigendur myndu hlekkja sig við bensíndælur (nú eða bara leggja bílunum sínum fyrir innkeyrslur að bensínstöðvum) þá myndu olíufélögin ekki dirfast að hækka verðið meira en heimsmarkaðsverð gefur tilefni til.

Ef neytendur myndu loka verslun sem okrar á þeim, þá myndi fyrirtækið lækka verðið.

Væri það virkilega svo hræðilegt?

[axel (IP-tala skráð) 1.8.2008 kl. 17:43]

Sæll Óskar.

Ég stend ekki fyrir neitt nema sjálfan mig eins og er.  Ég er bara venjulegur maður, fæddur í Reykjavík, flutti austur á firði og vann í fiski.  Bý í dag á suðurlandi.

Nei, ég er ekki hlynntur núverandi stjórn, né nokkrum þeim stjórnmálaflokk sem hér er í boði.  Ég vildi óska þess að við gætum fengið einhvern eins og Hugo Chavez.

Hinnsvegar stend ég fastur á því að með lögum skal land byggja, og á það jafnt yfir alla að ganga, þar á meðal Saving Iceland og Sea Shephard.  Paul Watson hefði átt að vera kærður á staðnum fyrir hryjuverk hér um árið, en Íslensk stjórnvöld virðast teygja vel á skoðanna og mótmælafrelsi útlendinga, en þegar fólk sem býr og vinnur hér á landi mótmælir með sambærilegum hætti er sprautað táragasi á lýðinn.

[Óskar Helgi Helgason (IP-tala skráð) 1.8.2008 kl. 17:51]

Sæll; Sigurður, sem skrifararnir aðrir !

Axel ! Þakka þér; skýrleika og skorinyrta málafylgju alla. Að vinna í fiski; er líkast til, eitt það göfgasta, sem hverjum og einum kann að hlotnast, á lífsgöngunni. Þekki það, af eigin raun.

Hvað Paul Watson snertir, fara skoðanir okkar saman, í einu og öllu, Axel, sem sjálfsagt víðar.

Með ágætum kveðjum, sem fyrr /

Óskar Helgi Helgason  

[Guðmundur (IP-tala skráð) 1.8.2008 kl. 17:52]

Þú segir nokkuð Axel.

Ég geri ráð fyrir að þetta sé "frelsissviftingin" sem þú átt við:

http://www.youtube.com/watch?v=lqo74gsXqjw

Segðu mér Axel, hvar er frelsisviftingin? Hvar eru læstu dyrnar?

Og segðu mér, hvað heitir hann aftur þessi starfsmaður Hönnunar, þessi sem er með ofbeldið?  

[Axel (IP-tala skráð) 1.8.2008 kl. 18:12]

Guðmundur.

Starfsmenn Hönnunar minntust aldrei á það að hurðum hafi verið læst, heldur að tréfleygar hafi verið reknir undir aðalhurð.  Í öðru lagi átti sér stað þarna brot á 231.gr almennra hegningarlaga sem hljómar svo:

Ef maður ryðst heimildarlaust inn í hús eða niður í skip annars manns, eða annan honum óheimilan stað, eða synjar að fara þaðan, þegar skorað er á hann að gera það, þá varðar það sektum eða [fangelsi]¹⁾ allt að 6 mánuðum. Þó má beita …¹⁾ fangelsi allt að 1 ári, ef miklar sakir eru, svo sem ef sá, sem brot framdi, var vopnaður eða beitti ofbeldi eða hótun um ofbeldi eða brot er framið af fleirum saman.  (Tekið af althingi.is)

Þennan starfsmann Hönnunar á Egilsstöðum þekki ég ekki, og í raun engann starfsmann Hönnunar.

52. sekúndna myndbrot sem sýnir aðeins endann á þessum 20 mínútum sem um ræðir er ekki nægilegt til þess að sýna fram á það að þetta atvik hafi átt sér stað á annan hátt er dómsvöld hafa talið, en er aftur á móti góð í hvaða áróðursherferð sem er.

[Sigurður Jónsson, 1.8.2008 kl. 20:58]

Svo það sé nú alveg á hreinu þá er ég mikill lýræðissinni. Ég hef upplifað það að sigra og tapa í kosningum,en það er meirihlutinn sem ræður og við það verður maður að sætta sig. Auðvitað er fólki frjálst að hafa aðra skoðun og mótmæla,en það hefur engin rétt til þess að taka lögin í sínar eigin hendur eins og Savin Iceland gerir. ég hef vakið athygli á því hvernig þjóðfélagið yrði ef við beittum sömu aðferðum værum við óhress með eitthvað. Það yrði upplausn og stjórnleysi í landi okkar. Værum við bættari með það? Örugglega ekki. Við verðum að sætta okkur við að meirihlutinn ræður og að það gilda lög í landinu.

[Óskar Helgi Helgason (IP-tala skráð) 1.8.2008 kl. 21:24]

Heill og sæll; Sigurður, og aðrir skrifarar !

Því miður; afsannaði hinn mikli marskálkur, Francisco Franco, á Spáni, gildi hins svokallaða lýðræðis, þótt svo honum yrðu á, þau mistök, undir lok æfi sinnar, að endurvekja konungdæmi það, sem sýndarkonungdæmi reyndist svo verða, Sigurður minn. Svonefnt lýðræði, reynist jafnan vera valdatæki burgeisa og annars undirmálsfólks, hvert makar krókinn, á kostnað hinna, sem minna mega. Sjáum dæmin, hér heima á Fróni, í nútímanum.

Hér; sem var, og er á Spáni, t.d., vantar þá valdastoð, sem her gæti kallast, og þar með, ómengaður, af áhrifum og brölti stjórnmálamanna, og gleymum því ekki heldur, að eiginlegt lýðræði gildir einungis, á 4 ára fresti, því er nú verr.

Talandi um meirihluta; jú, jú. Kerenský hershöfðingi Hvítliða, í Rússlandi, varð að lúta í lægra haldi, fyrir harðskeyttum meirihluta Leníns, og þeirra Trotskýs og félaga, eins og við munum, einnig. Þekkjum eftirleikinn, allt til 1991, austur þar, unz gamla Rússland varð endurvakið, öllum til heilla og gæfu.

Með ágætum kveðjum, í Eystri- Hrepp, og á Skeiðin /

Óskar Helgi Helgason      

[Eva Hauksdóttir (IP-tala skráð) 1.8.2008 kl. 21:40]

Þeir sem duglegastir hafa verið við að taka lögin í sínar hendur á Íslandi eru orku- og álfyrirtækin. Þau hefja iðulega framkvæmdir í leyfisleysi en í stað þess að þeim sé hegnt fyrir það, verður óvirðing þeirra við lög og reglur til þess að greiða fyrir þeim. Þar sem stjórnvöld hafa ekki sýnt þann dug að framfylgja lögum gagnvart þessum fyrirtækjum, neyðist hinn almenni borgari til að gera það sjálfur.

Það er ekki meirihlutinn sem ræður í þessu landi. Meirihlutinn kaus Samfylkinguna en sú flokksrola hefur svikið mikilvægasta kosningaloforðið sitt, sem var stóriðjustopp. 

Stóriðjufyrirtækin (og reyndar fleiri stórfyrirtæki) hafa orðið miklu meira vald en stjórnmálamenn og þau hafa allt of mikil ítök í fjölmiðlum líka. Stórfyrirtækjavæðing er þáttur í heimsvaldastefnu. Það sem mun gerast ef enginn sýnir af sér þá döngun að berjast gegn valdníðslu stórfyrirtækja er að við munum sitja uppi með fasistaríki. Ég vil frekar upplausn og stjórnleysi, þótt ég hafi nú svosem ekki mikla trú á því að meirihlutinn taki beinar aðgerðir upp á arma sína.

[Axel (IP-tala skráð) 1.8.2008 kl. 21:50]

Meirihlutinn kaus ekki Samfylkingunna.  Það voru ekki nema rúmur fjórðungur sem gerði það.  Það lítur alltaf betur út ef maður helur staðreyndirnar á hreinu áður en maður tjáir sig á (hálf)opinberum vettvangi.

[Eva Hauksdóttir (IP-tala skráð) 1.8.2008 kl. 22:06]

Takk fyrir að leiðrétta mig Axel, meirihlutinn kaus vinstri flokkana, ætlaði ég að segja.

[Eva Hauksdóttir (IP-tala skráð) 1.8.2008 kl. 22:07]

Eða miðjuflokkana öllu heldur, það er enginn vinstri flokkur á Íslandi,

[Axel (IP-tala skráð) 1.8.2008 kl. 22:10]

Minn skilningur er reyndar sá að 100% gildra atkvæða hafi farið til miðjuflokka. ;)

[Sig.Jónsson (IP-tala skráð) 1.8.2008 kl. 23:39]

Já, það er þetta með lýðræðið. Ég get nú ekki séð að það sé til betri leið en meirihlutinn ráði og að eðlilegt að kjósendur fái tækifæri á fjögurra ára fresti.Ég hef t.d. aldrei stutt frambjóðenda í forsetakosningum sem hefur náð að sigra. Getur maður nokkuð gert í því. Maður situr uppi með sigurvegarann hvort sem manni líkar betur eða verr. Ekki get ég farið á Bessastaði og hlekkjað mig við útidyrnar svo Ólafar Ragnar komist ekki inn.Finnst fóli að við sem vildum ekki Ólaf Ragnar ættum að gera það?

[Eva Hauksdóttir (IP-tala skráð) 2.8.2008 kl. 10:49]

Það hvort fólk leggur á sig beinar aðgerðir fer auðvitað eftir því hvort það er bara hálfsvekkt eða hvort er gjörsamlega gengið fram af því. Ég yrði t.d. ekkert hissa á því eftir að Ólafur Ragnar ákvað að sýna mannréttindabrotum stjórnvalda í Kína stuðning með því að mæta á Ólympíuleikana, þótt einhver vildi varna honum inngöngu á Bessastaði. Þegar ráðamenn bregðast, þá er eðlilegt að almenningur sætti sig ekki við það.

[Sig.Jónsson (IP-tala skráð) 2.8.2008 kl. 18:51]

Já.Eva,við eru allavega sammála um Ólafur Ragnar eigi ekki að fara til Kína,sem foreti Íslands. Ég er nú reyndar ekki sammála að meina Ólafi inngöngu á Bessastaði.