Jákvæðar breytingar í Vestmannaeyjum.

Ég skrapp til Vestmannaeyja um síðustu helgi til að fylgjast með einu af barnabörnunum á Shell mótinu. Það þarf nú aldeilis skipulagningu til að láta slíkt mót ganga upp. Keppt var á öllum völlum í Eyjum og gaman að fylgjast með áhuga strákanna,þarna eru örugglega framtíðar knattspyrnumenn okkar. Það eru 25 ár liðin frá því svona mót var fyrst haldið. Ég sat þá í bæjarstjórn og beiðni íþróttafélagsins um að halda svona mót fékk strax góðan stuðning bæjaryfirvalda.

Það er gaman að sjá hversu margt jákvætt er nú að gerast í Eyjum. Næg atvinna er. Miðbærinn er að taka miklum stakkaskiptum með nýjum og glæsilegum byggingum. Margir eru að gera lagfæringar á sínum húsum og íbúum fer á ný fjölgandi. Það sýnir sig nefnilega í sveitarfélagi eins og í Vestmannaeyjum að þar eru íbúarnir að skapa raunveruleg verðmæti fyrir þjóðarbúið.Það er kannski ansi hart fyrir íbúa í Eyjum að þurfa að taka á sig þungar byrðar vegna glannaskapar 30 plús 3 hópsins, sem tilheyrir fyrst og fremst Reykjavíkursvæðinu.

Eftir því sem maður hefur séð af tölulegum upplýsingum stendur Vestmannaeyjabær mjög vel fjárhagslega og á því alla möguleika á að geta haldið uppi öflugri þjónustu og staðið fyrir nauðsynlegum framkvæmdum.

Já, það var virkilega gaman að sjá þær jákvæðu breytingar sem eru að eiga sér stað í mínu fallega sveitarfélagi þar sem rætur manns eru.

 

Það eina sem var neikvætt var að ÍBV skyldi tapa fyrir FH á sunndagskvöldinu,en ég er sannfærður um að ÍBV nær fram hefndum næsta sunnudag og slær FH útúr bikarnum.