ÞIÐ VERÐIÐ AÐ SAMEINAST.

Blaðið 24 stundir birti í gær athugun sína á viðhorfi bæjar-og sveitarstjóra á því hvort setja ætti í lög að sveitarfélög mættu ekki vera minni en 1000 íbúar. Það vakti athygli mína hversu margir Sjálfstæðismenn vildu setja lög um þessa íbúatölu.Nú getur þannig háttað til að sveitarfélög sem hafa færri íbúa en eitt þúsund séu í mikilli samvinnu við önnur sveitarfélög, þau geta verið vel sett tekjulega og landfræðilega getur þannig háttað til að engin skynsemi sé í sameiningu.

Ég hef haldið því fram að það eigi að vera íbúarnir sjálfir sem ákveði hvort þeir vilji sameinast öðrrum sveitarfélögum. Það á ekki að þvinga sveitarfélögin til þess með lögum.

Ég hef líka haldið því fram að ávallt sé byrjað á öfugum enda í þessu sameiningartali. Það á að ákveða í samráði við Samband ísl.sveitarfélaga hvaða verkefni eigi að færa frá ríki til sveitarfélaga. Að sjálfsögðu þarf að láta fjármagn fylgja með verkefnum.

Sveitarfélögin munu þá sjálf sjá að það getur verið hagkvæmt að auka samvinnu eða að sameinast til að standa betur að vígi til að taka á móti auknum verkefnum. Ég hélt að við Sjálfstæðismenn vildum hafa hlutina þannig.

Allir sveitarstjórnarmenn vilja veita sínu fólki sem besta þjónustu og að fjármunir nýtist sem best. Náist það betur fram með sameiningu munu íbúar örugglega samþykkja það. Aðalatriðið er að það gerist með því að íbúarnir sjálfir taki um það ákvörðun en séu ekki þvingaðir til þess með lagasetningu.