NÝ ÚTRÁS ?

Nú hlýtur að hafa kviknað á perunni hjá mörgum athafnamanninum á Íslandi. Það þýðir ekki að gefast upp þótt fyrsta alvöru útrásarherferðin hafi klikkað. Hér er komin frábær hugmynd fyrir útrásarsnillingana. Nú er bara að setjast niður og búa til teiknimyndasögu eins og þeir í Frakklandi gera. Segja frá öllu veldinu og framtíðarsýninni. Á Íslandi áttum við ekki lengur að þurfa að stóla á fiskveiðar,landbúnað og iðnað. Fjármálaumsýslan átti að verða atvinnuvegur númer eitt. Öll þjóðin átti að lifa gósenlífi það sem eftir væri. Teiknimyndirnar verða örugglega skemmtilegar fram að hléi.

Það er ekki eins víst að allir verði jafn hrifnir af seinni hluta myndarinnar. En hvað með það. Þetta verður góð útflutningsvara og örugglega upphafið að nýrri útrás.

Ólafur Ragnar getur þá tekið upp fyrri siði og talað fjálglega um hina nýju teiknimyndaútrás okkar duglegu athafnamanna. Össur iðnaðarráðherra mun fagna því hann hefur alltaf séð tugmilljarða gróða í útrásinni. Þeir félagar verði líka fínir í myndasögunum.

Já,það er alltaf hægt að græða á góðum hugmyndum. Spennandi tímar framundan.

Úr verðbréfum yfir í teiknimyndabók