NETÞJÓNABÚ Í ÁRNESI ?

Miðað við það erfiða ástand sem nú ríkir í okkar landi skiptir miklu að horfa til framtíðar og kanna alla möguleika á að stofna til nýrra fyrirtækja sem geta skapað okkur gjaldeyristekjur.

Sveitarstjórn Skeiða-og Gnúpverjahrepps hefur rætt um möguleika á að auka fjölbreytni í atvinnulífinu. Liður í þeirri viðleitni er undirritun viljayfirlýsingar við Greenston ehf. s.l. föstudag um að kannaðar væru möguleikar á byggingu netþjónabús hér í Árnesi. Sveitarfélagið er tilbúið að útvega lóð fyrir 50.000 fermetra byggingu á 100.000 fermetra lóð.

Fyrir liggur viljayfirlýsing Landsvirkjunar um útvegun á a.m.k. 50MW orku.

Verði umræddar hugmyndir að veruleika mun það skapa 20 störf í Skeiða-og Gnúpverjahreppi og 20 óbein störf hér og í nágrannasveitarfélögunum.

Ég eins og margir aðrir hef bent á að það skiptir miklu að nýta orkuna sem verður til hér á svæðinu okkar.Það nær engri átt að öll orkan sé flutt í burtu.Það eru til svo miklir möguleikar hér á svæðinu til atvinnuuppbyggingar.

Aðilar komu aftur í morgun til að kynna sér nánar staðhætti og aðstæður hér í sveitinni. Hér er um mjög spennandi hugmyndir að ræða sem vonandi verða að veruleika.

Það skiptir öllu fyrir þjóðina að nýta þá miklu möguleika sem felast í orkunni. Takist okkur að nýta hana á skynsamlegan hátt mun birta fyrr upp í okkar efnahagsvanda.

Athugasemdir

[Gestur Guðjónsson, 15.10.2008 kl. 16:29]

Nú eru menn að tala af viti.

[Sigurjón, 15.10.2008 kl. 16:58]

Þetta eru svo sannarlega gleðifregnir!  Vonandi getur af þessu orðið og það sem fyrst.  Máski ég nái mér í kerfisstjóraréttindi og sæki um þegar að kemur...

[Bjarki (IP-tala skráð) 16.10.2008 kl. 11:06]

Veit einhver hvar maður getur nálgast almennar upplýsingar um þetta Greenstone félag? Maður hefur heyrt fréttir af því að þeir séu í samskiptum við ótal sveitastjórnir um uppbyggingu netþjónabúa. Ég hef heyrt af slíkum viðræðum við Akureyri, Dalvíkurbyggð, Fjallabyggð, Húnaþing, Ölfus og nú Skeiða- og Gnúpverjahrepp. Ég velti því fyrir mér hvort að þeir ætli sér uppbyggingu á öllum þessum stöðum eða eru þeir bara að halda öllum en enda svo á að velja einn stað.

[Sigurður Jónsson, 16.10.2008 kl. 11:32]

www.greenstonenet.com

 Þeir munu kynna þessa álitlegu staði og eftir því sem fram hefur komið er mjög líklegt að byggð verði fleiri en eitt netþjónabú.Við höfum þá trú að staðsetning í Skeiða-og Gnúpverjahreppi sé mjög góður kostur.

[Sigurjón, 16.10.2008 kl. 22:35]

Já, ekki verður langt að leggja rafmagnslínur úr t.d. Hvammsvirkjun.